Vaiga murder case: മകളെ ശ്വാസം മുട്ടിച്ച് പുഴയിൽ തള്ളിയിട്ടുകൊന്ന കേസ്; പിതാവ് സനു മോഹൻ കുറ്റക്കാരനെന്ന് വിധിച്ച് കോടതി

കൊച്ചി: പതിമൂന്നുകാരിയായ മകളെ പുഴയിൽ തള്ളിയിട്ട് കൊലപ്പെടുത്തിയ കേസിൽ പിതാവ് സനു മോഹൻ കുറ്റക്കാരനെന്ന് വിധിച്ച് കോടതി. എറണാകുളം പോക്സോ കോടതിയാണ് പിതാവ് സനു മോഹൻ കുറ്റക്കാരനാണെന്ന് വിധിച്ചത്. സനു മോഹനെതിരെ ചുമത്തിയ എല്ലാ കുറ്റകൃത്യങ്ങളും തെളിഞ്ഞു.

കൊലപാതകം, തട്ടിക്കൊണ്ടുപോകല്‍, തടഞ്ഞുവയ്ക്കല്‍, ലഹരിക്കടിമയാക്കല്‍, ബാലനീതി വകുപ്പ് പ്രകാരമുള്ള കുറ്റങ്ങള്‍ എന്നിവയാണ് പ്രതിക്കെതിരെ ചുമത്തിയിരുന്നത്. ഉച്ചകഴിഞ്ഞ് ശിക്ഷാവിധിയിൽ വാദം നടക്കും.

കങ്ങരപ്പടി ഹാർമണി ഫ്ലാറ്റിൽ താമസിച്ചിരുന്ന വൈഗയെയും സനുവിനെയും 2021 മാർച്ച് 21ന് കാണാതായതിനെ തുടർന്ന് നടത്തിയ അന്വേഷണത്തിലാണ് പിറ്റേദിവസം വൈഗയുടെ മൃതദേഹം മുട്ടാർ പുഴയിൽ കണ്ടെത്തിയത്. പിതാവിനെ കാണാനുണ്ടായിരുന്നില്ല.

വൈഗയുടെ മരണത്തിന് ശേഷം പിതാവ് സനു മോഹൻ നാടുവിട്ടെന്ന നിഗമനത്തിൽ തുടങ്ങിയ അന്വേഷണം നാടിനെ ഞെട്ടിച്ച കൊലപാതകത്തിന്റെ ചുരുളഴിക്കുകയായിരുന്നു. വൈഗയെ സനുവാണു കൊലപ്പെടുത്തിയതെന്ന് വ്യക്തമായ സൂചന ലഭിച്ചതോടെ പോലീസ് ഇതര സംസ്ഥാനങ്ങളിലേക്ക് അന്വേഷണം വ്യാപിപ്പിച്ചു.

കൊലപാതകം നടത്തി ഒരു മാസത്തിന് ശേഷം കർണാടകയിലെ കാർവാറിൽ നിന്നാണ് സനു മോഹൻ പിടിയിലായത്. രാജ്യ വ്യാപകമായി തെളിവെടുപ്പ് നടത്തേണ്ടി വന്ന അപൂർവം കൊലക്കേസിൽ ഒന്നായിരുന്നു വൈ​ഗ കൊലക്കേസ്. തമിഴ്നാട്, കർണാടക, മഹാരാഷ്ട്ര, ഗോവ, ബിഹാർ എന്നീ സംസ്ഥാനങ്ങളിൽ പോയി പോലീസ് തെളിവ് ശേഖരിച്ചു.